Prishtinë. Vendimi i Ministrisë së Transportit dhe Postë- Telekomunikacionit (MTPT) për të ndaluar qarkullimin e automjeteve me timon nga ana e djathtë është në kundërshtim me Kushtetutën e Republikës së Kosovës dhe dënim për qytetarët.

Kështu ka deklaruar Selatin Retkoceri, i cili ka marrë një iniciativë për t’i mbrojtur të drejtat e së paku 40 pronarëve të këtyre veturave. Ai duke qenë i bindur se Udhëzimi Administrativ nr 2008/08, lidhur me homologimin e automjeteve, bie në kundërshtim me Kushtetutën e Shtetit, ka vendosur të ngrejë padi ndaj MTPT-së dhe të mbrojë siç thotë ai të drejtat e qytetarëve që i kanë të garantuara me Kushtetutë.

"Do bëjmë padi në Gjykatën Kushtetuese të Kosovës për të mbrojtur të drejtat e qytetarëve të vendit tonë që jetojnë në Kosovë dhe në vende tjera, kupërdoren këto automjete. Kjo e drejtë garantohet me Kushtetutë dhe këtë do ta dëshmojë edhe gjykata. Deri më tani jemi mbi 40 qytetarë që kemi nënshkruar një peticion dhe kemi marrë këtë iniciativë", tha Ratkoceri, duke u thirrur në paragrafin 3 të nenit 46 të Kushtetutës, që, siç thotë ai, definon se askush nuk do të privohet në mënyrë arbitrare nga prona e tij.

"Në rastin konkret po ndodh privim nga prona, sepse askush paraprakisht nuk të ka pyetur, apo nuk të ka paralajmëruar se shteti më vonë mund të aplikoj një ligj, i cili më vonë do të pamundësojë përdorimin e veturave. Si qytetarë jemi dëmtuar financiarisht dhe për këtë duhet të ketë kompensim të menjëhershëm dhe adekuat të kostos së ndryshimit të kërkuar të krahut të drejtimit, ose kthimin e shpenzimeve doganore", ka pohuar Ratkoceri. /zeri//