Mançester Junajtedi dhe Lioni i janë bashkuar Arsenalit dhe Bajernit të Munihut në çerekfinale të Ligës së Kampionëve, pasi kanë arritur të eliminojnë Milanin, përkatësisht Realin e Madridit.

Mançester Junajtedi pas fitores në ndeshjen e parë në "San Siro" 3:2, në ndeshjen e kthimit np "Old Trafford" ka shkelur Milanin, me rezultat 4:0. Edhe këtë herë kreator i fitores së "Djajve të Kuq" ishte Uejn Runi, i cili realizoi dy golat e parë, derisa me nga një gol kontribuuan edhe Park dhe Fleçer.

Në anën tjetër, Lioni prishi ëndrrën e Realit të Madridit, i cili shpresonte se do të bëhej skuadra e parë e cila do të luante finalen e këtij aktiviteti në stadiumin e vetë.

Pas fitores në ndeshjen e parë 1:0, Lioni arriti që në "Santiago Bernabeu" të barazojë me madrilenët dhe në këtë mënyrë t'i gëzohet kualifikimit të mëtejmë. Reali kaloi në epërsi që në minutën e 6-të, me golin e Kristiano Ronaldos, por në minutën e 75-të boshnjaku Miralem Pijaniq ia 'preu këmbët' futbollistëve të Realit, duke barazuar shifrat në 1:1. / rtk / foto: telegraph.co.uk / 11 mars 2010